Bananabrauðbollur

Fyrir 6 eða 7 árum síðan rakst ég á frábæra uppskriftasíðu sem heitir Cafe Sigrún, þegar ég var að leita að uppskrift af góðu bananabrauði. Ég hef notað þessa uppskrift í grunninn síðan en breytt aðeins og bætt eftir hentugleika (og því hvað sé til í búrinu).
Stundum sofnar maður á verðinum yfir ávaxtakörfunni og á meðan jólaeplin og mandarínurnar eru alltaf vinsæl yfir hátíðarnar þá kemur fyrir að ávextir liggi undir skemmdum á þessum tíma. Það getur verið gott að afhýða og skera niður ávexti, sem eru farnir að nálgast síðasta neysludag, og setja þá í frystir. Þá er komin góð viðbót í skyrþeyting, sem er frábær morgunmatur.
Í morgun rak ég augun í tvo banana sem voru vægast sagt þroskaðir. Því svartari sem þeir eru, því betri eru þeir í bananabrauð, en ég átti ekki nóg í brauð svo ég ákvað að gera hálfa uppskrift og búa til bollur í staðinn.

Innihald

• 100 gr heilhveiti eða spelt
• 20 gr haframjöl
• 1 tsk vínsteinslyftiduft
• 1 tsk salt
• 1 msk agave síróp eða annað gott síróp (ég sleppti því í þetta sinn því ég átti það ekki til)
• 25 gr xylitol (eða 45-50 gr sykur)
• 2 egg (bætti við auka eggi því 3ja ára dóttur minni fannst svo gaman að brjóta það)
• 3 bananar (því þroskaðri, því betra)
• 2 msk ólívuolía, kókosolía eða önnur góð olía

Aðferð

1. Hitið ofninn í 180°C
2. Hrærið saman egg og xylitol (eða sykur).
3. Stappið bananana aðeins og blandið saman við eggjahræruna.
4. Bætið olíu og sírópi og hrærið áfram.
5. Setjið heilhveiti/spelti í aðra skál og bætið haframjöli, salti og lyftidufti út í.
6. Blandið mjölinu rólega saman við bananahræruna.
7. Ég notaði muffinsform til að baka bollurnar í, en það má alveg eins setja þær á bökunarpappír. Degið er ekki mjög þykkt svo það gæti verið að því hætti við að renna út ef það er ekki í móti.
8. Smyrjið formið vel og dreyfið deginu jafnt í formin.
9. Setjið inn í heitan ofn og bakið í 15 mínútur.
10. Berið fram með smjöri og osti.

Viðbætur

• Það er afar gott að bæta furuhnetum saman við degið.
• Það er hægt að baka stærri uppskrift og frysta. Ef bökuð er stærri uppskrift er um að gera að nota gott köku-/brauðform og þá er baksturstíminn lengdur í 40 mín.
• Döðlur virka mjög vel í bananabrauði og þá er best að nota ferskar, eða vera búinn að leggja þurkaðar döðlur aðeins í bleyti.
• Ég nota oft 1/3 af íslensku byggmjöli á móti heilhveitinu/speltinu. Brauðið verður aðeins þyngra og matarmeira fyrir vikið.
• Ef það eru börn á heimilinu, fáið þau endilega til að hjálpa til. Þó ekki sé nema bara til að hræra í mjölinu eða skúbba bananastöppunni í skál.

This slideshow requires JavaScript.