Í tilefni fimmtudags: Foie gras, fiskisúpa og ávaxtaspjót

Littla fjölskyldan var að flytja í nýtt húsnæði og eru allir aðilar svívirðilega ánægðir með það. Ásamt því að rífa upp úr kössum eins og vindurinn þá erum við almennt buzy. Eiginmaðurinn að æfa eins og vindurinn fyrir Rokkjötna og ég að reyna að ljúka lokaritgerðinni minni í Upplýsingafræði.

Í kvöld var eina kvöldið í langan tíma sem það eru ekki æfingar, vinkonuhittingur, fundir eða álíka skemmtilegheit. Þannig að við ákváðum að fyrsta eldaða máltíðin á nýja staðnum yrði almennileg. Eiginmaðurinn er nýkomin heim úr vinnuferð til Parísar þar sem hann fjárfesti í Foie gras, það var nýtt í kvöldmatinn. Réttir kvöldsins urðu þess vegna:

Forréttur: Foie gras á pönnuristuðu brauði með sultuðum balsamik vínberjum (uppskrift fengin á bloggsíðu Ragnars Freys Gíslasonsar)

Aðalréttur: Karrýfiskisúpa með skötusel og rækjum

Eftirréttur: Ávaxtaspjót með súkkulaði ala Áróra Ingibjörg

Ég gerði forréttinn, Maddi aðalréttinn og littla skottan fékk að velja eftirrétt og gera hann ein.

Foie gras á pönnuristuðu brauði og sultuðum balsamik vínberjum

Þetta var rosalega girnileg uppskrift sem ég fann á gömlu bloggsíðu Ragnars Freys Gíslasonar og virtist ekki vera erfið.

Það sem ég fílaði við hana var að það er ekki einhver 35 innihaldsefni í henni. Það sem þarf er:

• Snittubrauð
• Foie gras
• Vínber
• Balsamic Edik
• Sykur

1. Takið lúkufylli af vínberjum og skerið í tvennt.
2. Takið svo berin, lúkufylli af sykri og 2 msk af balsamic ediki og skellið í pott.
3. Látið malla í 15 mínútur.
4. Ekki setja berin sjóðandi heit ofan á gæsalifrina, heldur leyfið blöndunni að kólna áður en hún er notuð.
5. Skerið niður snittubrauðin og ristið á pönnu með smá olíu.
6. Þegar bæði brauðin og vínberin eru til þá má steikja lifrina. Takið bara smá „blob“ sem passar ofan á snittubrauð og skellið á pönnuna. Ekki steikja lengi því þá verður hún bara að drullu.
7. Setjið saman. Snittubrauð, foie gras, vínberjablanda.

Karrýfiskisúpa með skötusel og rækjum

Hér ákváðum við að taka smá „shortcut“. Við keyptum humarsúpu í fiskbúðinni Hafinu þegar við keyptum skötuselinn og rækjuna. Þetta er bara basic súpa með engu gumsi. Fínn grunnur sem við bættum við eftir okkar höfði. Innihaldið í fisksúpunni var:

• 1 dallur humarsúpa frá Hafinu (1 líter)
• 1 dós af kókósmjólk
• Hvítvín
• Chilli
• Hvítlaukur
• Steinselja
• Karrý
• Salt og pipar
• Skötuselur
• Rækjur

1. Skellið humarsúpunni í pott og leyfið að malla örlítið.
2. Bætið allri dósinni af kókosmjólk út í ásamt hálfum chilli, 3 hvítlauksrifjum, ca 1 dl hvítvíni, steinselju og kryddið eftir smekk með karrý og salt og pipar.
3. Þegar þið eruð tilbúin að borða súpuna náið þá upp suðu, skellið skötusel og rækjum út í, slökkvið undir pottinum, lokið á og látið vera í um 5 mínútur. Eftir 5 mínútur þá er sjávarfangið eldað og súpan tilbúin.

Ávaxtaspjót ala Áróra

Þetta er uppáhalds eftirréttur Áróru er það skemmir ekki fyrir að hún getur gert hann nánast sjálf á meðan við eldum. Við skerum bara ávexti í bita, bræðum súkkulaði og hún sér um afgang.